கண்ணில்லாக் கண்ணாடி

என் கண்ணாடிக்கு
கண்கள் முளைத்திருந்ததை
இன்று அதிகாலைதான் பார்த்தேன்

நான் எதிர்பார்த்ததை விட
அகோரமாக இருந்தது
நான் அழகாகத் தெரிந்தேன்
ஆனால் அதன் கோர விழிகள்
என்னை நிராகரித்து
எனக்குள் இறங்கின
கண்ணாடியின் நீள் கரங்கள்
என்னுடல் கிழித்து
உள்ளே பதிந்து
நார் நாராய் நார் நாராய்
இழுத்துக் கொண்டே இருந்தன

இது என்ன
எதன்மேலான ஆசை இது
மேலும் என்னென்ன
காயங்கள்
வலிகள்
கலைந்த கவிக்கருக்கள்
இன்றிரவுக்கான கனவு
நாளைக்கான பயம்
அடுத்த நொடிக்கான பொய்
இன்னொன்றிலான பொறாமை
ஏன் நேற்று, முந்தய நாள்,
முதல்மாதம் அதற்கு
முந்திய வருடக் காதல்கள்
துரோக நட்பு
அப்பப்பா ஆயிரம் ஆயிரம்

கழிவுச் சாக்கடைக்குள்
அமிழ்ந்த ஒரு ஊரின் பிணக்குவியல் போல
கணக்கற்று கணக்கற்று

பொல பொலவென உதிர்ந்த
புற உடம்பை அள்ளி
பொட்டலங் கட்டிஎடுத்து
என் முன்னே கடை பரப்பியது
கண்ணாடி

ஒரு தலைச் சிலுப்பலில்
மீண்டும் வளர்ந்தது உடல்
சாக்கடைப் பிணங்களை
தின்று கொண்டே
கண்ணாடி பார்த்தது

நான் மிக அழகாகத் தெரிந்தேன்
கண்களிருக்கவில்லை
அதற்கு
இப்போது எனக்கும்

நினைவு வன்புணர்ச்சி

அகோர நினைவுகளைப் பிரசவித்த
அசிங்கத் தழும்புகள் பல
என் வயிறெங்கும்
நான் மார்பு கிழித்தெறிந்த
அவற்றின் எச்சங்கள் பல
என் வழியெங்கும்

முண்டங்களெல்லாம் சேர்ந்து
முடிவிலியில் சந்திக்கின்றன
பிறிதொரு நாளில் எனை
இம்சிப்பது பற்றியும்
இன்னொரு மன வன்புனர்வுக்கான
இரகசிய ஆயத்தம் பற்றியும்
சூடாகவே விவாதிக்கின்றன

பிண நாற்றங்களிடையில் திமிறி
தன் மூச்சையே தேடும் உயிர்
வெற்று நெஞ்சுக் கூட்டில்
காதல் இருப்பதாகப் பிதற்றுகிறது
அது கனவில் இருக்கிறது

எதிர்பாராத கணத்தில் நடக்கும்
நினைவு வன்புணர்ச்சிகளில்
களைத்துக் கிடக்கிறது மனம்
காதல் பற்றிக் கதைக்க
அவற்றின் வாய் தேடுகிறது

எனினும் நீளும் வலிகளின் போது
முண்டங்களே பிரசவமாகின்றன
அவை முடிவிலியிலேயே தான்
சந்திக்கவும் செய்கின்றன

தானே தொலையும் நான்

தான் அடிக்கடி தொலைவதாக
அலட்டிக் கொண்டேயிருந்தது
"நான்"

நாலு பேருக்குள்
கலையும்"நான்" யாரென்பது தான்
எனக்கு விளங்கவேயில்லை

என் ஆழமனங் கிழித்து
எழுந்து பறக்கும் அதற்கு
தீனி போடுகிறது கூட்டம்

நெரிசலுக்குள் நின்று
நெக்குருகவே அது பெரும்
பிரயத்தனப்படுகிறது

அதற்கு கூட்டம் வேண்டும்
சிரிக்க
அழ

தான் தூங்கும் போதும்
கூடவர நிழலுக்கு
உத்தரவிட்டிருந்தது

திரளும் கூட்டம் தன்னை
தானறியாமலேவிளுங்குவதாகப்
பின்னர் கூறியது

சனத்துக்குள் சனமாகிப்
பிணமாகிப் போனேன் என்று
இருந்துவிட்டு அழவும் செய்கிறது

தொலைத்ததும் தொலைக்கப்படுவதும்
தொலைப்பதும் தொலைக்க இருப்பதும்
தன்னாலே அது தன்னுள்ளே என்ற
பரம உண்மை அறியாது

மரங்கள் பிசாசுகளாகும்
நடுநிசியில் விழித்திருந்து
"நான்"அடிக்கடி தொலைவதாக
அலட்டிக் கொண்டேயிருக்கிறது
"நான்"

நானேயறியாமல்

நான் கழற்றிப் போட்ட

இன்றைக்கான முகமூடிகளால்
நிரம்பிக்கிடக்கிறது என் கட்டில்
சிலது இப்போதும் சிரிக்கின்றன
பலது அழுதே கொண்டே
நடுநிசியில் பெருக்கும்

கண்ணீர்க் கடலில் மூழ்கி
மூச்சடைத்துத் திணறி விழித்தால்
என்னுடையதாயிருந்தவை தாம்

வேறொருவரினது என்று
வாதம் புரிகின்றன
நானே அறியாது நிகழ்ந்த

பண்டமாற்றங்களிடையில்

மௌனமாகிக் கிடக்கின்றன

என்னுடையவை
நாளையாவது அணியலாமென்று
பத்திரப்படுத்துகிறேன்
நாளை போலிகளில்லாததாகட்டும்

நித்திரை என்பதான பொய்

விஸ்வரூபமெடுக்கும் சில பல
விளக்கமற்ற கனவுகளுக்குள்
தொலைந்தே போனது தூக்கம்

தேடிப் பறந்த மனதோ - தன்னை
மயானங்களின் எல்லையில்
பேய் பிடித்துப் போனதாகத்
தகவல் அனுப்பியது

நித்திரை என்பதான பொய் வெளிகளில்
நின்று புலம்புவதில் கழிந்தன
என் ஒவொரு இரவுகளும்

தூக்கம் தின்னுவதாகச் சுட்டப்பட்ட
நினைவுப் பட்சி
வலிகளின் கல்லறைகளின் இடுக்கில்
உணவிட்டுக் கொண்டிருந்தது
அலகில் வழிந்தது என் மனதின் குருதி
தின்னப் பட்டிருந்தது
அன்றிரவுக்கான தூக்கம்

இன்றைய வலிகளுக்கு
இப்போது தான் கல்லறை செய்தேன்
இன்றிரவும் தூங்க வேண்டும் - ஆனால்
நீள் வெளிகளில் நின்று
அழுவதோடு நிறுத்த வேண்டும்
தூக்கம் ஏற்கனவே சாப்பிடப் பட்டிருக்கும்

என் ஒரு நாள்

ஒன்றுமே செய்யாமல் போனதற்காய்

ஓவென்று அழும் நொடிகளால்

நிரம்பிக் கிடக்கிறது

என் அறையின் குப்பைத் தொட்டி

நேற்றயதுகளில் புதைந்த

இன்றயதுகளுக்கான மனதைத்

தேடி தொலைந்தேனென்று

தாம் தூமென்று குதிக்கிறது பாதி நாள்

தவணை சொல்லி மீண்டெழுந்தால்

கழியும் கணங்கள் போக

மீதியில் வாழும் லாவகங்கள்

கைவரவில்லை உனக்கென்று

குற்றம் சுமத்துகிறது மீதி

அப்படியா என்று நான்

கேட்டு அழ முன்னமே

பிறந்துவிடுகிறது

எனக்கான அடுத்த நாள்

தொடரும் காதல்கள்

ஊசிக் குளிரில்

உறைந்து கிடக்கிறது

உயிர்

என் தெருவெங்கும் பூத்திருக்கும்

பனிப் பூக்களினடியில் கிடக்கிறது

நீ எங்கோ ஏகியதுக்கான

தடங்கள்

தொடரும் கோடைகளில்

கரையும் பனிகளில்

குளங்கள் கட்டி நிற்கிறது

காலம்

இறங்கித் தேடவும்

இடமும் தராமல்

கொட்டித் தீர்க்கிறது

தனிமை மழை

நான் பிறப்பதற்கு

முன்னோ கூடவோ

நீ பிறந்ததன் அடையாளங்கள்

அதிலே அழிகின்றன

எங்கோ நீ இருப்பாய்

என்பதான கனவில்

காதல் கொள்கிறது

என் கவிதை

அதன் வரிகளில் வழியும்

வலிகளில் மீண்டு - மீண்டும்

ஊசிக் குளிரில்

உறையத் தொடங்குகிறது

உயிர்

இன்னொரு கோடை

அதோ
வந்து கொண்டேயிருக்கிறது